Patay ang duha ka mga lalaki matapos nakuryente samtang nagakutkot sang bubon sa Sitio Pispis, Brgy. Tapi, Kabankalan City, Hwebes sang aga.
Ginkilala ang mga biktima nga sanday Warlito Rola, 47-anyos kag Haneboy Antemo, 38, lunsay residente sang Purok 4, Brgy Magballo, Kabankalan City.
Suno kay Jerehlod Oloroso, kaupod sang mga biktima, samtang nagakutkot ang mga ini, wala nila natalupangdan nga ang ila ginagamit nga tubular pipe ang nagtandog sa live wire nga linya sang NOCECO.
Ini ang gintunaan sang pagkasunog sang lawas sang duha ka mga biktima nga nag resulta sa ila nga kamatayon.