Wala sang klase sa pribado kag pampubliko nga mga buluthuan sa banwa sang Hinigaran kag Isabela, samtang ang mga Catholic Schools sa siudad sang Bacolod ang nag-suspend man sang klase sa pagdumdom sang ika-40 nga EDSA People Power Revolution.
Sa Executive Order 008-2025 nga ginpirmahan ni Hinigaran Mayor Grace Arceo, suspendido ang klase kag trabaho sa government offices buwas nga adlaw.
Kanselado man ang trabaho sa government offices kag klase sa banwa sang Isabela. Ini base man sa isa ka executive order nga ginpaguwa ni Mayor Miguel Angelo Yulo.
Ginsiling ni Atty. Neil Yanson, Legal Officer sang Department of the Interior and Local Government nga may ara man iban nga mga LGU sa bug-os nga pungsod ang nag deklarar sang work and class suspension.
Ginklaro niya nga apesar sang Presidential Proclamation 1006 nga ginpagwa sang Malakanyang nga naga deklarar sang February 25 bilang special working day, sarang magamit sang LGU ang General Welfare Clause sa Local Government Code sa ila pag-declare sang suspension sa government work kag klase.
Suno kay Yanson, indi naman sakop sang work suspension ang pribado nga sektor.
May ara naman sang klase kag trabaho sa gobyerno sa siudad sang Bacolod buwas nga adlaw.
Ginsiling ni Atty. Marty Go, Secretary to the Mayor nga magasunod ang siudad sa proklamasyon ni President Ferdinand Marcos Jr. nga special working day buwas.
Sa pihak sini, ang mga Catholic schools sa Bacolod City nag-suspend na sang klase agud makipagbahin sa pagdumdum sang EDSA revolution.
Half-day ang klase buwas sa La Consolacion College-Bacolod.
Bilog naman nga adlaw nga wala sang klase kag opisina ang University of Saint La Salle Bacolod, St. Scholastica’s Academy, Saint Joseph School of LaSalle, Colegio San Agustin Bacolod, kag University of Negros Occidental-Recoletos.
Ang iban nga mga Catholic schools ang natalana man nga magtambong buwas sa patigayunon nga rally sa siudad.*
[sibwp_form id=1]