Paglapas sang Code of Conduct and Ethical Standard kag Conduct Prejudicial to the Best Interest of the Public sa idalum sang Republic Act 6713 ang administratibo nga mga kaso nga ginpasaka sang siudad sang Bacolod sa duha ka doktor sang City Health Office.
Ini matapos nga gindagdagan sila sang City Legal Office sang show cause order. Isa sa ila ang ginreklamo sang mga staff sa CHO bangud sa iya pagpamuyayaw samtang ang isa naman ang ginreklamo sang isa ka rape victim nga pasyente bangud sa insensitive nga mga pahayag.
Ginsiling ni Atty. Joseph Karol Chiu, pamuno sang CLO, nga ginahulat nalang sang siudad nga mag file ang natungdan nga mga doktor sang appeal.
Kun tigayon nga makapasa sila sang ila appeal magasugod naman ang hearing sa kaso.
Dugang pa ni Chiu, ang apat ka mga gindagdagan sang administrative sanction nga taga City Engineer’s Office bangud sa mga nagtililig-a nga mga semento sa isa ka bodega, ang nagpangayo pa sang extension sa CLO agud makahatang sang ila nga sabat.
Samtang ang tatlo naman ka empleyado sang General Services Office ang tigayon na nga ginkakas sang siudad sa ila nga pwesto.
Suno kay Chiu, bakante na sa karun ang amo nga mga position.*
[sibwp_form id=1]