Ang mga banwa sang Vallehermoso kag Manjuyod sa Negros Oriental ang pagatukuran sang bag-o nga sub-stations sang Philippine Coast Guard.
Ginsiling ni Lt. Abigail Marionne Enopia, commander sang Coast Guard-Negros Oriental Station, nagpirma sang 25 ka tuig nga memorandum of agreement ang Vallehermoso, samtang 20 ka tuig naman ang Manjuyod.
Kilala ang Manjuyod sa mga turista nga luyag makakita sang whale kag dolphin sa Tañon Strait. Diri man makita ang bantug nga white sandbar.
Sa idalum sang layi, suno kay Enopia, kinahanglan magbutang ang mga coastal municipalities kag cities sang Coast Guard sub-station.
Ini agud mapaayo ang response time kag mapabaskog ang pagpatuman sang mga maritime laws batuk sa illegal fishing kag iban pa nga mga iligal nga buluhaton.
Sa karon, 11 pa lang ang sub-stations sang coast guard sa Negros Oriental.
May lima ka mga coastal municipalities sa Negros Oriental nga wala pa sang natukod nga Coast Guard sub-station.