Gin turn-over na kaina sang aga sang SM Foundation sa Bacolod City LGU ang duha ka mga upgraded nga mga health centers nga nahamtang sa dalan Mabini sa Barangay 28 kag sa Education Training and Center School sa Barangay 16.
Ini ang magaserbe sa 27,000 ka mga residente sa 15 ka mga barangay nga malapit sa nahamtangan sini. Ang amo nga mga pasilidad ang ginpatukod sang siudad, apang ini ang gin-renovate kag ginpanami pagid sang SM Foundation.
Ginakabig nga child-friendly ang amo nga pasilidad bangud ginhungod sang SM Foundation nga butangan ini sang holding kag play area kon sa diin pwede makahampang ang mga bata nga pasyente. Fully air-conditioned man ang pasilidad kag may ara ini sang kaugalingon nga pharmacy.
Ginsiling ni Connie Angeles, Executive Director for Health and Medical Programs sang SM Foundation, apesar nga ang operasyon sang health centers yara na sa LGU, ang foundation man sa gihapon ang maga-maintain sini. Tanan nga mga kinahanglan i-repair sa amo nga mga pasilidad ang akoon sang foundation.
Ini ang ikatatlo na nga health centers nga gin-upgrade sang foundation matapos nga una na nga nagbukas nagligad tuig ang San Juan Health Center sa Barangay 12. Ang pagpanami sang mga health centers sa pungsod ang kabahin sang Corporate Social Responsibility sang SM.
Suno kay Bacolod City Mayor Greg Gasataya, dako ang mangin bulig sang amo nga mga pasilidad para sa health services sang tagsa ka mga barangay nga sakop sini.*
[sibwp_form id=1]