Ginalauman nga sarang mapalip-ot sa duha tubtob tatlo na lang ka adlaw ang pagkuha sang mga permit kun mapatuman na ang e-governance system sa Bacolod.
Humalin sang Lunes ginsuguran na sang katapo sang Department of Information Communications Technology 6 ang integrated business system training para sa mga empleyado sang Office of the Building Official.
Ang training ang ginapatuman agud mahanas ang mga empleyado sang OBO sa digital system sa tion nga ipatuman na ang e-governance system sa Bacolod City Government Center.
Suno kay Engineer Isidro Sun, pamuno sang OBO, masami nagalawig sa tatlo ka semana antes matapos sang mga aplikante ang pagkuha sang mga permits kasubong sang sa sanitary, plumbing electrical kag building permit sa siudad.
Pero sa tion nga mapatuman na ang e-governance system posible nga mapalip-ot sa duha tubtob tatlo na lang ka adlaw sarang na makuha sang mga aplikante ang mga ginakinahanglan nila nga mga dokumento kag permits.
Ang e-governance system ang kabahin sa mga prayoridad sang Benitez administration agud man mapadasig, mas mangin accessible kag transparent ang pagserbisyo sang siudad sa pumuluyo.