Pinaka una nga human milk bank sa isla sang Negros ang ginbuksan sa Teresita Lopez Jalandoni Provincial Hospital sa Silay.
Ang human milk bank nga naga tuyo magbulig sa mga lapsag nga labing nagakinahanglan sang gatas ang proyekto sang Rotary Club – Metro Bacolod kaupod ang probinsya sang Negros Occidental.
Suno kay Dr Mary Ann Maestral ang chief of hospital sang TLJPH, may mga iloy nga naga produce sang madamo nga gatas kag sarang ini maka bulig sa mga iloy nga ginakulang sa gatas para sa ila nga lapsag. May mga napulo man ka tuig nga sila ang nag lobby para maka angkon sang milk bank.
Paathag ni Dr Jean Alojado ang head sang Pediatrics Department sang TLJPH ginahaylo nila ang mga pasyente nila nga madamo sang gatas nga mag donate.
Ang proseso suno sa iya, amo nga iga pasteurize ang breastmilk.
Ang gatas nga napa idalom na sa proseso ang pwede nga mag lawig sa ila nga freezer tubtob sa isa ka tuig.
Labing nagakinahanglan sang breastmilk ang mga pre mature babies, ang mga lapsag nga may masakit ang iloy kasubong sang breast cancer, kag yadtong mga lapsag nga ang iloy nagtaliwan. Pwede nga ma avail sang libre ini sang mga indigent.
Daku ang bulig sang milk bank suno sa TLJPH. May mga iloy nga sa iban pa nga lugar nagakuha sang gatas para sa ila nga lapsag. Tuman ang sustansya kag nutrition sang breastmilk.