19 anyos nga motorcycle rider patay matapos mabungguan sang truck sa Tanjay City, Negros Oriental.
Mga motorista mga lima ka oras nga na stranded sa dalan.
Makita pa sa sini nga CCTV video ang pagkabunggo sang isa ka 10 wheeler sa 19 anyos nga lalaki nga naga dala sang motorsiklo sa may highway sang Barangay Santa Cruz Viejo, Tanjay City sa Negros Oriental.
Base sa CCTV video naglapad sa pihak nga lane ang motorsiklo kay may nagpondo nga bus gani nadalasa sang truck ang rider.
Sa report sang PNP, nag overtake ang motor sa nagpondo nga bus kay may nagpanaog nga pasahero. May duha lang ka lane sa dalan gani pag overtake sang motor natiempuhan man nga naglabay ang truck. Patay na sang mag abot sa ospital ang motorcycle rider.
Gin custody sang Tanjay PNP ang driver sang truck kag sang bus para mausisa. Wala naman sang may iban pa nga nasamaran sa amo nga insidente.
May mga motorista nga nagpabutyag nga halos lima ka oras nga na stranded sa highway bangud sang amo nga insidente.