Naabtan sang otoridad ang anum ka abandonado nga mga boxes nga naga-unod sang Badlon ukon Golden Trevally nga isda sa Food Terminal Market sa Brgy. 6 sa siudad sang Bacolod, Domingo sang hapon.
Suno kay Coast Guard Commodore Jansen Benjamin, Station Commander sang PCG Substation Northern Negros Occidental , Bacolod City nagpatigayon sang joint operation ang Bureau of Fisheries and Aquatic Resources , Coast Guard Station Northern Negros Occidental kag Police Station 2.
Nadiskubrehan ang boxes sang mga isda 1:45 sang hapon nga ginabulubanta nagabug-at sang 180 kilos kag nagabalor sang P50,000.
Suno kay Benjamin, iligal ang pagdakop sang mga isda bangud nakuha ini pinaagi sa dynamite fishing kag wala nahibaluan kon sin-o ang tag-iya.
Kun matumod ang tag-iya sang mga isda, magapang-atubang siya sang kaso may angut sa Section 126 sang Republic Act 10654 ukon “Possessing, Dealing in or Disposing Illegally Caught or Taken Fish”.
Gindonate ang mga isda sa orphanage sang Holy Family Homes Inc. sa Barangay. Cabug, siuad sang Bacolod.