Antes pa man sang natalana nga pagbalhin sang mga tenants sang Manokan Country, magapadala na sang notice to vacate ang City Legal Office sa 18 ka mga tenants nalakip diri mga flower shop, kalan-an kag iban pa nga baligyaan nga nasakpan sang Manokan Country.
Suno kay City Legal Officer, Romeo Carlos Ting, Jr., kadam-an sa mga tenants ang naga ilistar naman sa Manokan. Sa Nobyembre tinguhaan nila nga ma-issue ang notice to vacate.
Ginapaabot ni Ting nga sa sini nga semana matagaan sang authority to sign si Mayor Albee Benitez para man sa ginadihon nga memorandum of agreement sa tunga sang Bacolod LGU kag SM Prime Holdings Incorporated para sa pag-develop sang Manokan Country nalakip na diri ang Vendors Plaza kag Bays Center nga kabahin sa kapin 3-hectare property sang siudad sa reclamation area.