Kaso nga abduction in relation to Republic Act 7610 ukon ang Special Protection of Children Against Child Abuse, Exploitation and Discrimination ang ginpasaka batuk sa 18-anyos nga lalaki nga gintudlo responsable sa pag abduct sang lima ka tuig nga bata nga babaye sa Talisay City sang Lunes sang hapon.
Samtang, ginhilway sang Talisay City PNP ang 41 anyos nga una ginpasibangdan sang 18 anyos kag sang iya kaupod nga 12 anyos nga bata.
Ginsiling ni Police Captain Wilma Silva, spokesperson sang Negros Occidental Police Provincial Office, nagwa sa ila pagpang usisa nga wala sang pat-ud nga partisipasyon ang napasibangdan nga persona nga taga-Bacolod.
Yara na sa custody sang City Social Welfare and Development Office ang 12 anyos nga bata nga lalaki.
Samtang ginahulat pa ang resulta sang medical examination sang menor de edad nga babaye.
Na-rescue ang 5 ka tuig nga bata sa Barangay Villamonte sa Bacolod sang Martes sang kaagahon sa bulig sang WCPD Talisay, barangay social workers kag Police Station 4 sang Bacolod PNP.
Natungod sang natabo nagapasalig sang mas mabaskog pa nga pagpatuman sang curfew for minors ang kapulisan agud matapna ang posible modus.