Sa Canlaon City, as of 8pm sang Nobyembre 6, nagdangat na sa 16 patay, 11 pilason.
May kabudlayan pa sa pagpadulong sa siudad pero sarang na makadtuan ang siudad sa karon.
Isa lang anay ka lane ang pwede ma agyan sang mga motorista.
Ang isa ka lane may naga tinumpok nga mga bato. Ang iban diri daw parehos sa salakyan ka dalagko.
May mga lunang kag puno sang kahoy sa higad sang dalan.
May mga salakyan nga nahal-id bisan diin.
Ini matapos nga mag awas ang tubig sa suba sang ginbalabagan sang mga dalagko nga puno sang kahoy nga na anod halin sa bulkan Kanlaon.
Gani ang mga bato kag ang tubig nag rekta sa mga pamalay, commercial establishments pati kag sa dalan.
Sa video ni Jerry Delubio makita pa ang daw nangin dagat na ang dalan kag ang bus terminal.
Mabaskog ang daludo sang tubig. Gani nagtaklas na sila sa kisame sang building.
Matapos ang baha napulo ka mga bus ang nalubong sa lunang. May salakyan pa sang gobyerno. May naga alisngaw nga baho sang patay.
Sa unhan sang bus station ang balay nanday Sarah Jane Diaz. Si Sarah Jane nakaluwas kaupod ang iya duha ka menor de edad nga anak pero ang walo ka miyembro sang iya pamilya nagkalamatay kay gin sulod sang baha kag bato ang ila nga balay. Ang bangkay sang iya mister sa Moises Padilla na nasapwan.
Ang Canlaon city ginpaidalom na sa state of calamity.
Dako ang kinahanglan nga bulig sang siudad para matinluan ang dalanon gikan sa lunang, mga bato kag kahoy.
Kun halin Bacolod makapa Canlaon via Don Salvador Benedicto, San Carlos City, Vallehermoso lusot sa Canlaon.