16 ka mga banwa kag siudad sa Negros Occidental ang nag suspend sang face-to-face classes sini nga adlaw.
Ini base sa report sang Negros Occidental Operations Center as of 8am.
Suno kay Negros Occidental Governor Eugenio Jose Lacson, yara na sa tagsa ka local government unit ang desisyon sa pag suspend ukon pag padayon sang klase.
May mga lugar nga nag report sang pag-ulan dala sang Habagat nga gin pabaskog ni bagyon Nando, pero suno kay Lacson wala naman sang may nag report sang pagbaha magluwas na lamang sa Sitio Tamburong sa Biak na Bato sa La Castellana.
Sa bahin naman sang Bacolod LGU, ginpahayag ni Bacolod City Mayor Greg Gasataya nga wala sang weather warning ukon alert level nga basehan ang lokal nga panguluhan agud magdeklara sang suspension sang klase.
Suno sa alkalde, wala sang “coding” ukon advisory halin sa PAGASA gani indi ini rason para magdeklara siya dayon sang class suspension kun i-base sa existing protocols.