Nagapadayon ang pagpanghanda sang Bacolod City Police Office para sa pag plastar sang security plan sa ginapaabot nga Batang Pinoy 2026 sa Bacolod City sumugod December 12 tubtob 18.
Ginsiling ni BCPO Director Colonel Eugene Rebadomia nga 1,500 ka mga pulis ang igadeploy para sa amo nga kompetisyon. 60 to 70 percent diri ang magahalin sa pwersa sang BCPO samtang ang iban naman ang iga-augment sang Police Regional Office Negros Island Region.
Magasugod ang deployment sang PNP sa December 11, bangud amo man ini nga adlaw ginalauman nga mag-inabot ang mga atleta kag coaches gikan sa iban nga mga lugar.
Masobra sa 35,000 ka mga delegates ang ginaaabot nga magtambong sa kompetisyon.
Magluwas sa mga hotels, may 34 man ka billeting areas nga ginhanda ang siudad kag kalabanan diri mga public schools suno kay Rebadomia. Apat ka mga police personnel ang igapahamtang sa tagsa ka billeting area agud magbantay sa seguridad sang mga atleta.
Dugang ni Rebadomia, may lain nga approach sa security measures sila nga ipatuman bangud menor-de-edad ang tanan na mga atleta sa Batang Pinoy 2026.
Kadungan sang opening sang Batang Pinoy sa December 12, pagahiwaton man sa Bacolod City ang parade of stars para sa Metro Manila Film Festival.
[sibwp_form id=1]