150 ka mga layaw nga ido kag kuring ang target nga makapon sang siudad kada bulan sa bulig sang animal welfare group agud nga mapahagan-hagan ang kaso sang rabies.
Kada bulan halos indi maatipanan sang maayo sang city dog pound ang mga layaw nga ido kag kuring nga ginapangdakop sa pila ka mga barangay sa Bacolod.
Gani agud nga mabuhinan ang kadamuon sang layaw nga mga hinuptanan kag subong man mapahagan-hagan ang kadamuon sang rabies cases, naghugpong ang city government upod sa pito ka mga animal welfare group para mapasanyug ang neuter kag spay program.
Sa pagpanguna sang PAWSsion Project, upod sa Care, Inspyred, BACH Project, Fur Haven Sanctuary, BARK kag Animal Kindness, may 150 ka mga layaw nga ido kag kuring ang tuyo nga makapon sang siudad kada bulan.
Suno kay City Administrator Pacifico Maghari,III, maga-agi man anay sa animal welfare group ang mga ginapangsikop nga hinuptanan agud nga mabuhinan ang kadamuon sang mga gina-impound nga ido kag kuring sang City Veterinary Office sa city pound.
Sa pagdumdom sang rabies month karon nga Marso, Ginlunsar man sang siudad pinaagi sa #isugid mo kay Mayor ang Alaga.
BCD project agud nga matagaan solusyon ang mga problema bahin sa pagpangsikop sang layaw nga hinuptanan, pet rescue and adoption, rehoming kag fostering pati na ang pagpasanyug sang program batuk sa animal abuse kag rabies vaccination.