Si Christian Vargas sang Canlusong sa EB Magalona pa lang ang nakuha sang iya pamilya. Isa siya sa apat ka mga napatay sa encounter sa Sitio Balik Balik, Barangay Tabu sa Ilog.
Ang tatlo ka iban pa ang wala pa nakadtuan sang ila nga mga pamilya. Paathag ni Police Staff Sergeant Josephus Tierra, imbestigador sang Ilog PNP ang trese ka mga gindala nga mga persona sa police station sang Ilog sang Martes ang wala ginpang aresto kundi gin usisa lang kun ngaa ara sila sa lugar sang natabo ang encounter.
Gilayon man sila gin papauli sang mahibaluan nga wala man sila sang kahilabtanan sa natabo nga encounter.
May mga pamilya na nga nag amat amat balik sa lugar matapos magbiya bangud sang kakulba.
Martes sang gin operate sang Special Action Force sang PNP ang lugar matapos maka baton sang impormasyon nga may mga npa sa lugar nga naga pangilkil kag naga pang recruit. Magluwas sa 4 ka mga napatay, may duha ka mga napilasan.