Wala sang tinaga nga maka laragway sa kasakit nga gina batyag sang ini nga iloy sang iya makita ang kahimtangan sang iya anak matapos ang apat ka oras nga search and rescue operation sang Silay City Disaster Risk Reduction Management office kahapon.
Istorya sang amay ni Earl nagpaligo sa suba ang iya bugtong nga anak kaupod ang mga abyan kag himata mga las dos sang hapon.
Manabaw lang kuno ang tubig sa suba pero may isa ka bata nga nalumos amo kun ngaa gin luwas siya ni Earl.
Suno sa amay ni Earl masami wala niya gina pasugtan nga magpaligo sa suba ang iya unico iho pero sang kahapon nagpasugot siya bangud manabaw lang man ang tubig sa suba.
Masako ang amay sang amo nga mga inoras bangud naga paninlo pa sang nabahaan nga balay.
Luwas na sa katalagman ang bata nga ginluwas ni Earl pero si Earl mga apat ka oras nga gin salom sang mga rescuers para makit-an. Suno sa amay, patay na siya sang mag abot sa ospital. Masakit batyagon pero ang hinimuan ni Earl nga pagluwas sa iya nga abyan amo ang naga pabakod sa ila.
Wala sila sang sakit sang buot sa bata nga ginluwas sang ila anak, siya kuno ang maga pahanumdom sa ila nga kun ano ka maayo klase nga bata ang ila nga anak kag nangin isa siya ka baganihan.