Personal nga nagpadulong sa La Castellana si Governor Eugenio Jose Lacson sini nga hapon.
Luyag niya nga mapat-od ang sitwasyon sang mga evacuees kag kun bala sarang na sila nga makapauli.
Suno sa gobernador, may 1,360 ka persona gikan sa Barangay Mansalanao ang ginhatagan sang clearance nga makabalik sa ila nga mga balay.
Kahapon ginsugdan sang Department of Health ang water testing sa mga water sources sa evacuation center kasubong man sa mga lugar nga apektado sang paglupok sang bulkan.
Gina pasalamatan sang gobernador ang tanan nga nagpadala sang bulig labi na supply sang tubig lakip na ang Philippine Red Cross.
Suno kay Dr Girlie Pinongan ang Provincial Health Officer, ila gina pasiguro nga wala sang may matabo nga second outbreak ayhan sa gastroenteritis ukon sa mga respiratory related nga masakit sa mga naga tenir sa evacuation center.
Ang banwa na lamang sang La Castellana ang may nabilin pa nga evacuees.