132 ka mga pamilya nga naga okupar sang lugar sakop sang 4km permanent danger zone sa Kanlaon nga ginakabig man sa karon nga strict protection zone ang hinyuon nga maga biya na sa amo nga area.
Ini suno kay Department of Environment and Natural Resources Negros Island Regional Director, Charlie Fabre nga nagsiling nga kabahin ini sa tikang nga ila nga ipatuman kasunod sang nagluntad nga pag baha dala sang bagyo Tino nga nagtuga sang pag kautas sang 98 ka kabuhi kag tuman nga kahalitan sa infrastructure kag agrikultura.
Suno kay Fabre, luyag nila nga ibalik ang lasang sa sining mga special protected zone bangud isa sa mga natukiban nila sa pag pangusia nga ginpatigayon kasunod sang pagbaha amo nga na convert ang ini nga mga lugar sa agricultural area.
Suno kay Fabre sulatan nila anay ang ang mga natungdan para mapat-od man kun ano ang ila nga mga basehan sa pag okupar nila sa sining mga lugar.
Kun indi man matigayon ang boluntaryo nga pag biya sa area, ma pwersa nga mag file sang kaso ang ila nga talatapan.
Suno sa OCD may 47 ka pamilya sa Canlaon City ang yara sa PDZ, 63 naman ang gikan sa La Castellana nga yara sa PDZ. Suno kay OCD Director Donato Sermeno may 22 man ka pamilya sa Bago City.
Dugang pa ni Fabre dapat may yara sang easement, ukon napat-od kun tubtob diin lang dapat pwede nga magamit ang duta.
Sa report sang DENR ang flashflood tuga sang mabunok nga ulan lakip na ang damlag pa pag humok sang duta dala sang pila ka mga linog kag indi tuga sang gina siling illegal logging.*