Philippine Red Cross Negros Occidental–Bacolod City Chapter Emergency Response Unit (ERU) nag responde sa mga apektado sang baha sa banwa sang Ilog.
Philippine Red Cross Negros Occidental–Bacolod City Chapter photo
13 ka mga banwa kag siudad sa Negros Occidental ang ginbaha. Masobra naman sa 6,000 ka pumuluyo ang gin-evacuate.
May mga balay nga na anod. Kabankalan City naga plano mag deklarar state of calamity.
Base sa 11am nga report sang Provincial Disaster Risk Reduction Management Office, 6,797 ka mga persona ang yara sa mga evacuation center sa nag kalain-lain nga LGU.
Ang siudad sang Kabankalan ang may pinaka madamo nga gin evacuate – 1,613 ka pumuluyo.
Suno kay Mayor Benjie Miranda, as of press time, iya iga convene ang City DRRMC. Wala labot sa mga gin-evacuate ang mga talamnan lubog man sa tubig baha suno sa iya.
Ang Sipalay City may masobra sa 1,400 nga gin-evacuate. Ang Isabela may masobra sa 1,300.
May mga gin-report pag baha kag gin-evacuate man sa Hinoba-an, Cauayan, Binalbagan, Himamaylan City, Ilog, Candoni, Hinigaran, Calatrava, Moises Padilla kag Pontevedra.
Sa Moises Padilla may apat ka mga balay nga gin-report gin anod sa Sitio Sulbod sakop sang Brgy Crossing Magallon. Na anod sa suba sang Binalbagan ang mga balay.
May apat man ka balay nga naguba sa Hinoba-an kag apat sa La Castellana suno sa PDRRMO.
Nagakabalaka man ang mga mangunguma. Suno kay Pedro Limpangog ang presidente sang Federation of Irrigators Association Central Negros bag-o lamang naka sabwag ang mga rice planters kag karon, natabunan sang tubig baha ang mga talamnan labi na ang sakop sang fourth district.
Suno kay Irene Bel Plotena ang pamuno sang PDRRMO, flash flood ang nag-igo sa southern Negros.
Halos tanan nga mga banwa kag siudad sakop sang 5th kag 6th District sang Negros Occidental suno kay Governor Eugenio Jose Lacson ang natup-an sang tayuyon nga pag-ulan.
Pero suno sa iya base sa ulihi nga advisory sang PAGASA ginapaabot na ang pag tupa sang ulan sa bilog nga probinsya.
Kun may mag deklara man sang state of calamity suno kay Governor Lacson iya na nga gina paabot ini.