12,000 ang gina paabot maga tambong sa November 30 nga “Trillion Peso March” sa Bacolod.
Suno kay anay Governor Rafael “Lito”Coscolluela sang grupo nga TAMA NA, sa ila nga listahan sa mulit-sectoral group may 7,000 nga maga upod sa anti-corruption rally nga hiwaton sa mismo Bonifacio Day. Suno sa Bacolod Diocese, may 5,000 gikan sa simbahan ang maga upod sa martsa.
Suno kay Bacolod Bishop Patricio Buzon, may 85 ka dioceses sa bilog nga pungsod, kag masobra sa 50 ukon mayoriya ang maga upod sa lihok.
Suno kay Coscolluela, may patigayunon man nga kasubong nga activity ang Diocese sang Kabankalan.
Sa Bacolod may duha ka mga assembly points sa South Capitol Road kag sa area sa Lupit Church. Mga 12:30 maga sugod tipon kag 1:30 naman sang hapon maga sugod ang martsa padulong sa replica sang Government Center sa public plaza.
Klaro ni Coscolluela indi man gid nila mapat-od ang kadamuon bangud kasubong sang nagligad nga “Trllion Peso March” sang Setyembre, may iban nga nag paiway na sa pag martsa kag sa venue na nag upod tipon. Ginapaabot las 2 tubtob las 4 sang hapon ang programa.
Ang panawagan nila – accountability kag genuine transformation. Ila nga gina pakamalaot ang nagakatabo nga massive corruption nga naglamon sa sistema sang gobyerno.
Suno kay Bishop Virgilio Amihan Jr., sang Iglesia Filipina Independiente ini ang tion nga magpanindugan kontra korapsyon.
Panawagan nila ang maid-id kag impartial nga imbestigasyon sa corruption nga natabo sa mga public works kag government projects kasubong man sa abuso sa public funds. Suno kay Coscolluela dapat nga may ma preso.
Suno kay Bishop Buzon, malawig ang proseso gani dapat may pasensya man. Nagapati siya nga may yara sa gihapon sang paglaum.*