Wala pa nakalab-ot sa konseho sang siudad ang rekomendasyon angut sa pag award sang relocation area para sa dose ka mga pamilya nga yara sa critical danger zone bangud sang nagluntad nga landslide sa Purok San Jose sa Barangay Alijis.
Lima sa dose ka mga pamilya ang yara pa sa evacuation area bangud wala na ginpahanugutan sang drrmo nga magbalik sa ila puluy an bangud sang peligro nga natuga sang pagkatiphag sang duta sa pangpang.
Suno kay Councilor Renecito Novero, chairperson sang SP committee on urban poor housing and resettlement, maga depende sa kooperasyon sang apektado nga pamilya ang madasig nga pagpa- ambit sa ila sang relocation area sa Arao Relocation Site sa Barangay Vista Alegre kun madasig man ang ila pag submit sang ginakinahanglan nga requirement sa Bacolod Housing Authority.
May duha-duha pa ang pila ka mga pamilya nga magbalhin sa relocation site pero karon nagalaum sila makahalin na sa evacuation area sang Emilia J Garcia Elementary School kag makasaylo sa ila mangin ilistaran.
Plano sang DRRMO,DSSD upod sa pamunuan sang buluthuan nga samtang ginaproseso pa ang application para sa relocation sang dose ka pamilya, isaylo anay sila sa separado nga school building nga indi gamiton para sa May 9 elections.