11 ka barangay sa central kag northern nga bahin sang Bacolod City ang apektado sang pagbaha matapos ang madamol nga ulan kahapon.
May isa ka motorcycle rider nga gin-report nga napilasan matapos nga mabunggo sa mga baral sa taytay sa Barangay Singcang-Airport.
Base sa datus nga ginpagwa sang Disaster Risk Reduction and Management Office sang Bacolod ang mga apektado nga lugar amo ang Barangay 3, 4, 8, 9, 10, 12, 14, 19, 20, Mandalagan kag Villamonte.
Suno kay Dr. Laarni Pornan, head sang DRRMO Bacolod, nagtaas ang level sang tubig sa may Carvic, Barangay Mandalagan, bangud malawig na nga panahon nga wala na dredge ang suba malapit sa lugar.
Gin monitor man sang otoridad ang suba sa GK Village, nga bisan wala nag-awas, may yara gihapon sang mga residente nga nag- evacuate bilang precautionary measure.
Ginpahayag ni Pornan nga padayon ang monitoring kag dredging operations sang DRRMO sa mga suba kag kanal sa siudad agud mapahagan-hagan ang epekto sang pagbaha sa masunod nga mga inadlaw.
May isa ka motorista nga nahulog sa manhole sa corner sang 12th kag Lacson Street sa Bacolod kag may isa pa gid sang kagab-i nga nabunggo sa baral sa taytay sa Singcang-Airport malapit sa mall nga nag angkon sang fracture.
Wala sang bagyo kag malayo ang LPA pero ang easterlies ukon ang mainit nga hangin gikan sa Pacific Ocean ang nagdala sang ulan.
Bwas gina paabot nga posible mangin bagyo ang LPA kag maga sulod sa PAR.
Kun mangin bagyo na, tawgon ini nga Ramil.