Ginabulubanta nagabalor P2.2 M ang balor sang mga narekober nga cable wire sang Philippine Long Distance Telephone Company (PLDT) gikan sa 11 ka mga persona nga nadakpan nga ginapangsunog ang mga kable sa Barangay Concepcion, siudad sang Talisay, Lunes nga adlaw.
Kalabanan sa nga gindakup ang residente sang Talisay.
Domingo nga adlaw, Hulyo 13, nadiskubrehan nga ginkawat ang mga kable sang PLDT sa Barangay Villamonte.
Lunes nga adlaw, may nag-report sa Maritime nga may nagapangsunog sang kable sa Zone 3 sa Brgy. Concepcion.
Naglunsar sang joint operation ang Maritime kaupod ang Talisay Police Station sa lugar kag ila naaktuhan ang 11 ka mga persona nga nagapangsunog sang cable wires nga may ngalan pa sang PLDT.
Suno sa otoridad, masami nga ginasunog ang cable wires agud makuha ang copper sa sulod sini kag ibaligya.
Ginturn-over na sa Bacolod Station 4 ang mga ginpangdakup kag sila ang magapangatubang sang kaso nga theft.
Magapasaka man sang separado nga kaso angot sa Republic Act 8749 ukon Philippine Clean Air Act of 1999 ang Maritime batuk sa mga gindakup.