May 11 ka mga banwa kag siudad lakip na ang Bacolod City nga nag-report sang ash fall.
Sa banwa sang Hinigaran kag asta na sa pila ka mga lugar sa Bacolod ang abo gikan sa bulkan Kanlaon matapos ini ang naglupok liwat Martes sang kaagahon.
Isa ang Barangay Miranda sa banwa sang Hinigaran nga naka-eksperyensya sang ash fall, nga nagsugod las otso y medya sang aga. Sang tinalikdan nga Abril 8, nagtupa man ang manipis nga abo gikan sa Kanlaon sa nasambit nga barangay.
Magluwas sa Miranda, naka-eksperyensya man sang ash fall, base sa report sang Provincial Disaster Risk Reduction and Management Council ang 20 ka mga barangay sa Pontevedra, bilog nga San Enrique, 10 ka mga barangay sang Bago, apat ka mga barangay sang La Castellana, 16 ka mga barangay sa Valladolid kag walo ka mga kabarangayan sang La Carlota City.
May gin-report man nga light ashfall sa Binalbagan kag Murcia. May baho sang asupre gin-report sa San Carlos City kag Valladolid.
Samtang ang Bacolod DRRMO ang nagpa-gwa sang advisory angut sa paglapta sang abo sa pila ka mga barangay sa Bacolod sini nga hapon.
Mahimo ang mabaskog nga ulan ang nagdala sang abo gikan sa paglupok sang bulkan.