Onse ka mga commercial establishment malapit sa unibersidad sa dalan Lizares gin issuehan sang notice of violation kag ginpauntat baligya sang makahulubog nga ilimnon.
Antes pa man magbukas ang klase ang katapo sang Bacolod Permits and Licensing Office nang serbe sang notice of violation sa mga ilimnan nga wala sang business permit sa dalan Lizares sa Bacolod sa kilid lang sang isa ka university.
Kaupod ang katapo sang Police Station 6 kag DSSD ginsaway kag ginpapuli man nila ang mga customer nga menor de edad nga nakit-an naga-inom sang makahulubog nga ilimnon.
Suno kay City Legal Officer Atty. Romeo Carlos Ting, Jr., onse tanan ka mga baligyaan nga wala sang business permit ang na-issuehan sang notice of violation. Ginpauntat naman sila baligya sang makahulobog nga ilimnon.
Ang pag-inspeksyon sang mga ilimnan nga malapit sa mga buluthuan ang ginpatuman sang otoridad bangud man sang reklamo sang mga ginikanan batuk sa mga nagabaligya sang makahulubog nga ilimnon sa mga menor de edad nga kabataan.