Ginbutang na sa isa ka shelter sang probinsya ang 11 anyos nga bata nga biktima sa pagpangastigo sang iya pamilya sa siudad sang Talisay.
Suno kay Dionela Madrona ang head sang Talisay City Social Welfare and Development Office , naka-gwa sa ospital ang bata sadtong Abril 10, apang padayon ang iya nga recovery bangud may pila pa ini nga kinahanglanon sa iya nga pag-ayo ukon may patigayunon pa nga medical intervention.
Buligan siya sang CSWDO sa pag-attend niya sa hearing kag pag-witness batuk sa mga akusado.
Padayon man ang bulig pinansiyal sang Local Government Unit sa menor edad.
Dugang pa ni Madrona sa luyag naman nga magpalab-ot sang bulig sa bata, ipadangup lang sa opisina sang CSWDO kay sila na ang bahala nga ipalab-ot ini sa shelter kun sa diin ang bata sa karun.
Sang Semana Santa sang ma rescue ang menor de edad nga ginsulod sa poso negro sang iya iloy kag mga tiyo matapos nila ini nga ginkastigo. Naka panugid man ang bata nga ginsulod man siya sa cage sang ido amo kun ngaa may mga kinagtan siya sang ido sa iya tiil.
Ginkasuhan na ang iloy, duha ka tiyo kag live-in partner sang isa sa ila sang child abuse.