Martes sang hapon, ginturn-over sa Bacolod Police Station 7 sang kagawad sang Barangay Vista Alegre sa Bacolod ang 11 ka sachets sang ginsuspetsuhan shabu nga gin-alegar nakuha sa isa ka menor de edad.
Ginsiling ni Police Captain Dax Santillan, hepe sang Station 7, ginahulat pa nila ang resulta sang laboratory examination agud mahibaluan kun shabu gid man ang mga nakuha.
Sa interview sang media kay Kagawad Elizalde Benedicto, iya ginpahayag nga nakita nila ang bata nga may bitbit nga mga sachets kag gin-pitik-pitik ini. Sang ila siya gintawag, gulpi lang ginhaboy sang bata ang mga sachets sa salog sang gym.
Sang ginpamangkot ang bata, iya ginsiling nga napulot niya lamang ang mga sachet sa basurahan.
Gintipon naman sang kagawad ang mga sachets nga ginabulubanta lima ka gramos kag may estimated price nga P34,000.
Ginturn-over na ang bata sa iya ginikanan.