Tuyo sang Bacolod City Veterinary Office nga mabakunahan sang anti-rabies ang 100,000 ka mga kuring kag ido sa bug-os nga siudad.
Nagsugod na kahapon nga adlaw ang schedule sang house to house vaccination program sa Barangay Granada kag magalawig ini tubtob Pebrero 26.
Sa record sang CVO, may 80,000 ka mga kasapatan ang nabakunahan sang nagligad nga tuig kag tuyo naman nila magsaka ini sa 100,000 ka mga bakunado nga sapat sini nga tuig.
May ara na sang isa ka kaso sang rabies ang na record sini nga tuig. Ang ido nga nag positive sa rabies taga Barangay Vista Alegre.
Ginsiling ni Mayor Greg Gasataya, nga ini ang nagapadayon nga programa sang siudad agud mas ipalapit ang serbisyo sang gobyerno sa mga nasakpan.
Ginklaro sang CVO nga wala sang bayad ukon libre ang pagpabakuna sang mga kasapatan bangud nagpain ang siudad sang 6 million pesos agud pundohan ini.
Suno sa Assistant City Veterinarian nga si Dr. Janine Sarthou, ini ang isa sa mga solusyon agud tapnaon ang nagataas nga kaso sang rabies sa siudad.
Magapadayon ang house to house vaccination sang siudad sa tubtub Agosto kag magapadulong sa iban pa nga mga barangay sa masunod nga mga binulan.*
[sibwp_form id=1]