Bisan nagapanalithi wala ini makapugong sa katapo sang Nikki Cares Foundation nga nagpatigayon sang feeding activity sa kapin 100 nga mga kabataan sa Barangay 14 sa Bacolod.
Upod sa Negros Volunteers for Change Foundation, nanagtag sila sang food packs kag utan nga nasulod sa mga bags nga gikan sa tarpaulin sang mga kandidato sang tinalikdan nga piniliay.
Tuyo sang foundation nga mapahagan-hagan ang kaso sang malnourished kag stunted children sa pagsaulog man sang Nutrition month.
Ang iloy nga si Nosil Gayumale, 41 anyos temprano pa naghalin sa ila balay sa relocation site sa Barangay Vista Alegre para maka ambit sang bulig ang iya duha ka mga magagmay nga kabataan.
Manicurista ang trabaho ni Nosil kag tricycle driver naman sa barangay ang iya bana.
Bangud ginakulang man sa kwarta, masami duha ka beses na lang sa isa ka adlaw nagakaon ang iya pito ka mga kabataan.
Indi lang pagkaon, mga vitamins kag iban pa ang ginbitbit pauli sang mga iloy kag mga kabataan.
Nag enjoy man sila sa mga pahampang kag papremyo nga dala sang Nikki Cares Foundation.
May mga teddy bears man nga ginpanagtag sa 100 ka mga kabataan.
2017 sang ginsuguran sang foundation ang mga surgical mission sa pila ka mga lugar sa probinsya.
Kag karon nga mas halog na ang mga Covid 19 restrictions plano nila nga dal-on ini sa Bacolod upod ang iban pa nga mga outreach activity sa mga kabarangayan sa siudad.