Nakarekober ang katapo sang Philippine Coast Guard-Southern Negros Occidental sang ginabulubanta 100 ka boxes sang gin-alegar smuggled cigarettes sa old port sang Barangay Cartagena sa Sipalay City, kaina sang kaagahon.
Nakabaton sang report ang Coast Guard angut sa pag-transport sang smuggled nga sigarilyo sa lugar.
Nagdinalagan ang kapin sa 20 ka mga persona matapos mamutikan ang presensya sang mga operatiba sa area.
Gin-abandona sang mga crew kag laborers ang sakayan pandagat nga ginkargahan sang mga kinarton nga sigarilyo, pati na ang duha ka mga panel vans nga may karga man nga mga sigarilyo.
Samtang, nawasak ang bangka nga yara na sa shoreline, matapos nabunggo ini sa batuhon nga porsyon sang baybay tungod sa dalagko nga balud.
Base sa numero nga nakita sa bangka, halin sa Basilan ang nasambit nga sakayan.
Yara na karon sa kustodiya sang Coast Guard ang duha ka panel vans kag ang mga sigarilyo.
Nag-coordinate ang Coast Guard sa Bureau of Internal Revenue agud ma-inventory kag mahibaluan ang market value sang mga nakumpiskar nga sigarilyo.
Sa karon, wala pa sang persons of interest ang otoridad sa kun sin-o ang nagapanag-iya sang nasambit nga mga smuggled nga sigarilyo.*
[sibwp_form id=1]