Ginbuksan na ang bag-o nga Covid Isolation facility sa siudad sang Cadiz Biernes sang aga.
Ang 32 million pesos nga isolation facility kag yara nahamtang sa tambi sang main nga building sang Cadiz District Hospital ang may 100-bed capacity.
Suno kay Negros Occidental Governor Eugenio Jose Lacson, nga nakit-an na sa publiko matapos maka-recover gikan sa Covid-19, maka bulig ang bag-o nga isolation facility sa pag decongest sang main nga building sang ospital nga subong may 124 ka mga Covid patients.
Ang main building may 93 bed capacity gani sa kabilugan mga 200 ang sarang nga ma accommodate sa amo nga Covid designated hospital.
Kun kinahanglan pa gid pwede man mabuksan sang probinsya bilang Covid designated hospital ang Valladolid District Hospital kag bisan pa ang Valeriano Gatuslao Memorial Hospital sa Himamaylan.
Naga paandam ang gobernador sa publiko nga mild man ang virus karon pero ini ang labing makalalaton. Sa iya nga kaso nagapati ang gobernador nga naka bulig ang pagbakuna sa iya lakip na ang booster shot.