Sa ceremonial turn-over sa apat ka mga eskwelahan sa siudad nga gintambongan ni Bacolod Mayor Greg Gasataya, tigayon na nga nabaton sang masobra 5,000 ka mga estudyante ang libre ka school bags kag school supplies kadungan sa una nga adlaw sang klase.
Una nga ginkadtuan ni Gasataya amo ang Antonio L. Jayme Elementary School sa Barangay Mansilingan nga may masobra sa 2,000 ka mga estudyante. Kasunod naman ang Kabugwason Elementary School, Mandalagan Elementary School kag Abkasa Elementary School.
Suno sa alkalde, sang weekend palang, na deliver na sa tanan nga mga public elementary schools kag high schools sa siudad ang mga school supplies.
Kutob sa indi makadtuan sang alklade, ang tagsa na ka eskwelahan mismo ang maga panghatag sini sa ila mga estudyante.
Masobra sa 113,000 ka mga elementary kag high school students sa bug-os nga siudad ang makabaton sang libre nga school supplies kag bags. Samtang PE Uniforms naman kag sling bags ang para sa mga high school kag senior high school students.
Samtang, ang mga late enrollees nga wala madala sa listahan sang mga benepesyaryo, ang gin pasiguro man sang alkalde nga mahatagan sa masunod nga mga inadlaw.
Tuigan nga ginpatigayon ang paghatag sang libre nga school supplies sa mga estudyante sa Bacolod City, sandig sa City Ordinance 09-16-787.*
[sibwp_form id=1]