Sa video ni Paula Petalla makita nga naga kinarankaran ang pila ka mga persona sa pagtabang sa mga kabataan nga nagkalapilasan sang mahulog ang ila nga gina sakyan nga tricycle sa suba sa Barangay San Fernando, Talisay City Miyerkules sang hapon.
Sa report sang Talisay City PNP, isa ka pamilya ang sakay sa tricycle kag lunsay mga residente sang Barangay Banago sa Bacolod City.
Magapaligo kuntani ang mga biktima sa suba sang Imbang apang suno pa sa driver, wala nagkagat ang iya preno rason nga nahulog ang tricycle padulong sa suba nga may dalagko nga mga bato.
Ginbuligan sang mga naga paligo sa suba ang mga sakay sang tricycle lakip na ang apat ka magagmay nga mga kabataan.
Nakaangkon sang minor injuries sa nagkalain-lain nga bahin sang ila lawas ang mga biktima.
Madasig naman nga nagresponde ang mga katapo sang Talisay CDRRMO kag gilayon nga gindala ang mga biktima sa Talisay City Health Office.