Mabatian pa kaina sang aga ang tukar sang sound system gikan sa gym sang Purok Isla sa Barangay Villamonte.
Pero gilayon man ini nga ginpapatay kag ginpahimus sang purok council.
Suno sa purok president nga si Jerold Go, indi siya luyag nga pamensaron sang kaiping nga purok nga may pabayle sila sa pagsaulog sang ila tuigan nga kapistahan.
Pasado las onse kagab-i sang may napulo ka mga persona ang ginsikop sang katapo sang Police Station 4 sa purok sang gin-alegar madakpan nga naga bayle kag naga-ilinom.
Ang napulo ka mga persona ang gilayon nga ginpang-isyuhan sang citation ticket bangud sa pagsupak sang curfew.
May plano man kuntani ang purok nga maghiwat sang pahampang sa mga kabataan. Pero wala na lang nila ini gindayon bangud man sang reklamu.
Kaina isa ka misa ang ginbuylugan sang pumuluyo sa pagdumdom man sang ila patron nga si San Lorenzo Ruiz.
Hugot nga ginapahanumdom sang pamunuan sang Department of Health 6 nga karon nga yara sa high risk ang bacolod kag napaidalom man sa alert level 4, dapat mapaiway ang ano man nga sahi sang pagtililipon ukon mga super spreader event agud mapunggan ang paglaton sang Covid-19.