Naka half mast ang hayahay sa pagbukas sang pulupandan municipal hall humalin sang ginpatuman ang 2 day closure sang Lunes.
Ini kabahin sang pagdumdum kag pag unong sang banwa sa kalisod sang pamilya sang nagtaliwan nga anay Sangguniang Bayan member.
Ang anay opisyal sang banwa ang kabahin sa napulo ka mga Covid-19 deaths humalin sang setyembre uno sandig sa record sang Municipal Health Office.
Para kay Municipal Administrator Mahjie Infante, masubo ang halit nga natuga sang Covid-19 ilabi na sa mga pamilya nga nalisdan kag pati na sa ekonomiya sang banwa.
Kabahin sa mga nangin tikang sang banwa ang pagpabaskog pa sang nasugdan nga vaccination program.
Ang 31 anyos nga farm caretaker nga si Rolly Matos , Jr isa sa mga nagpadulong kaina sa municipal auditorium agud makapabakuna.
Suno sa iya, wala na siya kuntani sang plano nga magpabakuna para sa second dose. Pero sang mahibaluan ang angut sa pagtaliwan sang iya kaingod, nagbalik siya sa vaccination center sang banwa para magpabakuna.
Ang trisikol drayber nga si Manuel Escamilla wala naman nagpili pa sang igabakuna sa iya sa handum nga makakuha siya sang insigida nga proteksyon batuk sa makamamatay nga Covid-19.
Target sang banwa nga mabakunahan ang 21 mil ka mga indibidwal. May masobra na sa dos mil ang fully vaccinated.
Pero indi malipod nga may yara gihapon sang nagaduha duha nga magpabakuna
Nagapati si Governor Eugenio Jose Lacson nga ang pagsaka sang Covid-19 cases kag deaths ang posible tuga sang Delta variant.
Sa kabilugan may 29 na ang Covid-19 related deaths sa probinsya sa sulod duha ka semana.