Patay ang isa ka 30-anyos nga lalaki matapos matiruhan sa Purok 7, Brgy. Isio sa banwa sang Cauayan, sadtong pagbulag sang tuig.
Ang suspek sa krimen nga si alyas “Awa”, bata sang barangay kapitan.
Antes sang pagpaniro, nagapatunog-tunog sang tambutso ang mga pumuluyo sang nag-itsa sang palupok ang utod ni “Awa” nga si alyas “Budi”.
Naiguan sang palupok ang hinablos sang biktima nga si alyas “Erwin” gani naakig ini kag ginsumbag si “Budi”.
Nagluntad ang komosyon kag sang nagtahaw na, nagpadulong si alyas “Budi” sa Cauayan proper.
Samtang, nagkumprontahanay sanday “Awa” kag “Erwin” nga nagresulta sa paglabo sang biktima sa suspek.
Nalab-an si “Awa” sa ulo. Apang nagpalupok siya sang pusil nga nag-igo kay Erwin rason sang iya kamatayon.*