Nagkala-ula ang mga inug-deliver nga tinapay sa dalan matapos ang natabo nga bungguanay sa Sitio Malasbalas, Barangay Orong sa Kabankalan City, kung diin isa ka persona ang patay kag isa ang pilason.
Imbulbado sa traffic incident ang isa ka tricycle nga ginagamit sa pag-deliver sang tinapay, isa ka panel delivery van kag Toyota Hilux.
Patay ang helper sang tricycle nga ginkilala kay alyas “Poldo, matapos makaangkon sang head injury, samtang pilason ang driver sang tricycle nga si alyas “Julian”.
Sa imbestigasyon sang Kabankalan PNP, nagasundanay kag pareho nga naga-usoy padulong Kabankalan proper ang tricycle kag ang panel van, samtang padulong Mabinay nga direksyon ang pick up.
Bangud sa nagapadayon nga construction sa dalan, mahinay ang pagpadalagan sang tricycle, ugaling nadulaan sang kontrol ang driver sang panel van nga ginkilala kay alyas “Asher”, rason nga nabungguan sini ang pang-ulihi nga bahin sang tricycle, pati na ang nagasugata nga pickup truck.
Gindala ang driver kag helper sang delivery tricycle sa ospital apang gindeklarar nga dead on arrival ang helper.