Patay ang isa ka ginapatihan rebelde sa engkwentro nga nagluntad sa Sitio Taluktok, Barangay Sandayaw, sa Guihulngan City, Negros Oriental pasado las 8 kaina.
Suno kay Brigadier General Inocencio Pasaporte, Commanding Officer sang 303rd Brigade Commander, lima ka mga rebelde nga kabahin sang Central Negros Front 1 sang Communist Party of the Philippines-New People’s Army ang naka-enkwentro sang tropa sang 62nd Infantry Batallion nga naka base sa Barangay Libas, banwa sang Isabela.
Isa ka wala pa makilal-an nga persona ang napatay sa enkwentro.
Pahayag ni Pasaporte, nakabaton sang report ang mga militar nga may presensya sang armado nga grupo sa amo nga barangay kag gilayon man nga nagpatigayon sang tactical operations ang 62nd IB.
Narekober sa encounter site ang isa ka sub-machine gun nga loaded sang isa ka magazine, isa ka 357 pistol, kag granada.
Wala naman sang pilason sa bahin sang militar.
Nagapadayon pa ang hot pursuit operation sang 62nd IB.