Patay ang isa ka rider, samtang pilason ang duha ka iban pa kag isa ka persona nga naulamid sa pagbungguanay sang tatlo ka mga motor kag dump truck sa Economic Highway sa Purok Badyang sa Barangay Sum-ag sa Bacolod City, mga las 9 sang kagab-i.
Ginsiling ni Police Major Elmer Bonilla, chief sang Traffic Enforcement Unit, nagapalumba-anay ang tatlo ka mga imbulbado nga motorsiklo kag posible wala nila makita ang truck.
Nag-gwa sa imbestigasyon nga yara sa center island, nagapa norte ang dump truck nga ginamaneho ni alyas “Romie”, sang magaliko kuntani ini pawala sa Economic Highway.
Apang nakabunggo ang tatlo ka mga motorsiklo nga nagapadulong sa East sang Economic Highway.
Nagkalapilasan ang duha ka riders, apang ang isa sa ila nga ginkilala kay alyas “Louie”, taga Brgy. Tabunan sa Bago City, ang napatay.
Ang isa sa duha ka mga riders nga napilasan ang nagbilin sang iya motor kag nagdalagan palayo sa lugar.
Gindapatan sang first aid ang nabilin nga rider nga si alyas “RR” kag ang pedestrian nga si alyas “Lena”, nga nakaangkon sang pilas.
“Nagapalumba na sila mong. (Daw drag race?) Daw amo sina eh. Medyo dulom but may street lights man na da pero kay ti dasig gani ang dalagan nila”, suno kay Bonilla.*
[sibwp_form id=1]