Tungod sang padayon nga pagsaka sang presyo sang produkto petrolyo nagatuyo karon ang katapo sang United Negros Drivers and Operations Center ukon UNDOC nga mag untat byahe.
Suno kay Diego Malacad, secretary general sang UNDOC, napahibalo na nila ang mga natungdan nalakip na ang pila pa ka mga grupo sang transport sector angut sa plano nga indi magbyahe sa sulod sang lima ka adlaw.
Sa Miyerkoles magasapul ang UNDOC upod sa pila ka mga transport group agud ma desisyunan ang schedule sang pag-untat byahe.
Gina demanda sang grupo ang pagkakas sang 12 percent value added tax sa presyo sang produkto petrolyo, pati na ang pag hold anay sang excise tax kag ang ginadihon nga pag phase out sang mga daan nga public utility vehicle nga kabahin sang modernization program sang Land Transportation Franchising and Regulatory Board upod sa Department of Transportation.
Ginahinyo man nila ang duha ka pesos kag sinkwenta sentimos nga saka sa plete.
Humalin sang bulan sang enero maka syam man nga nagsaka ang presyo sang petroleum products, nalakip na ang diesel nga halos 3 pesos na ang ginsaka.