Sa karon gina tugyan sang grupo ni Mayor Bing Leonardia sa ila nga legal team ang pagtuon kag pag hibalo sang posible legal remedy agudto ma pa recheck ang mga vote counting machines para man masabat ang mga palamangkutanon sang katapo sang Grupo Progreso kag mga suporter sini sa resulta sang piniliay.
Isa sa ginkwestion sang grupo ang pag malfunction sang pila ka mga VCM. Ginsiling ni Leonardia nga “mysterious and unbelievable” ang deperensya sa boto labi na sa mga lugar nga ila balwarte.
Ginlutos ni anay congressman Albee Benitez sa boto nga 171,893, si Leonardia nga nag kuha naman sang 107,447 votes.
Suno kay Benitez, yara na sa kampo ni Leonardia kun mag file man sila sang reklamo, pero ang kamatuoran masakit gid man.
Suno kay acting Provincial Elections Supervisor Roberto Salazar, sarang maka file sang reklamo sa Comelec ang bisan sin-o, pero yara na sa tagreklamo ang pag pamatuod sang ano man nila nga alegasyon.
Nagtambong si Benitez sa proclamaton nanday Governor Eugenio Jose Lacson kag Vice Governor Jeffrey Ferrer kaina sang aga.
Suno sa duha ka matag-as nga opisyal sang probinsya gina paabot nila ang mas masulhay kag mas hirupay nga koordinasyon sa Negros Occidental kag Bacolod City.
Maga pahuway lamang sa makadali si Benitez kag gilayon siya nga mag porma sang transition team agudto suno sa iya masugdan na gilayon ang pag trabaho kag ipaiway na ang pulitika.