Nagapabilin nga masako ang mga negosyo sa kilid sang Rosario Street sa Bacolod sa pihak man sang duha ka mga magkasunod nga kaso sang pagpamatay nagluntad halin sang Dominggo.
Pero indi malipod nga may pila ka mga residente ang nagakabalaka. Pila sa ila wala nagpa interview sa kamera, pero paagi sa messenger sila ang nagpabutyag nga halos wala na sila naga-gwa pa kun gab-i tungod sang mga hitabo.
Dominggo sang ginkibot sila sang pila ka mga lupok sang gintiru kag ginpatay si Police Staff Sergeant Joseph Nepomuceno sang wala makilal-an nga riding in tandem.
Martes sang gab-i, liwat sila nga gintublag sang mga lupok kag pagsaksi sa wala ulo nga bangkay ni Glenn Paul Castillo nga ginbilin sang mga armado nga lalaki nga sakay sa separado nga toyota innova.
Si castillo ang bag-o lang naka-gwa sa bilanguan sa iya kaso may kaangatanan sa iligal nga droga.
Siya kag ang iya live-in nga si Analie Baldevieso nga na detain pa karon sa Police Station 9 ang nadakpan sa buybust operation sang City Drug Enforcement Unit sa Barangay Cabug sang Agosto 21, kun diin si Nepomuceno ang nangin kabahin sa mga operatiba.
May special investigation task group nga gintukod ang BCPO para sa sini nga mga kaso.
Ginpahayag sang pamunuan sang Bacolod City Police Office nga indi pa nila mapat-ud kun may koneksyon ang magkasunod nga kaso sang pagpamatay.
Pero ginpasiguro man ni BCPO City Director Police Colonel Manuel Placido nga wala sang dapat ikaalarma ang publiko.
Sa panaysayon sang kabulig ni Castillo sa iya sini nga utod, may mga armado nga lalaki nga nagkuha sa biktima sa ila nga balay antes masapwan ang iya nga bangkay.
Ang Investigation and Detection Management Unit sang BCPO upod sa katapo sang Criminal Investigation Group, PNP Legal Services kag PNP stations amo karon ang naga-usisa sa magkasunod nga kaso sang pagpamatay sa siudad.
Ini matapos ginmandu man ni PNP Chief Police General Guillermo Eleazar ang pagsolbar sa kaso sang ginpatay nga pulis.