Nagatabok sa pedestrian lane ang mag-asawa nga mga senior citizens sang sila ang ginbunggoan sang motorsiklo sa atubang sang Corazon Locsin Montelibano Memorial Regional Hospital sa dalan Lacson, Bacolod City, takna las 3:41 sang kaagahon, Huwebes, Hunyo 25.
Bangud sang impact, naigo sa semento ang ulo ni alyas “Rosita”, 63-anyos, nga nagresulta sa iya kamatayon samtang pilason ang iya bana nga si alyas “Genaro”, 73-anyos, pareho residente sang Barangay Pasil sa EB Magalona.
Napilasan man ang driver sang Yamaha Aerox nga si alyas “Zyrll”, 24-anyos, taga Brgy. 9, Bacolod, kag alyas “John”, 32-anyos, taga Brgy. 12 sa Bacolod.
Nag-gwa sa imbestigasyon nga gikan ospital ang mag-asawa kag nagatabok sa pedestrian lane, apang sang yara na sila sa tunga sang dalan, sila ang ginbunggoan sang motor nga padulong norte kag ginabulobanta may kadasigon nga 70 kilometers per hour.
Ang driver sang motor ang gin-alegar hubog kag suno sa mga saksi sa lugar, may dala pa nga ilimnon ang mga riders.
Yara karon sa Abe Funeral Homes ang lawas sang babaye nga tigulang samtang ang tatlo ka mga pilason ang gin-rescue sang Amity Ambulance kag Chamber Rescue Team kag gindala sa CLMMRH.
“So far wala pa kay ang family waay pa man. Depende na sa ila kung mag-decide sila mag-file sang complaint. Ang aton kapulisan ya ihanda ta lang man ang mga requisite para sa filing of case. Pero kung mag-areglo sila, ila na ya nga level. Ti subong indi ta pa na maka-call sa ila kay gina-una pa to ang napatay. Then ang driver sang motor ato man sa ospital. Kung maka-gwa na guro, that’s the time nga ma meet-up sila sa station para kung ano ang desisyon, follow-up sang aton investigator,” suno kay Police Capt. Elmer Bonilla, chief sang Traffic Enforcement Unit.*
[sibwp_form id=1]