Nagdangat sa 2,249 ka ektariya sang mga katubuhan sa Visayas ang nahalitan sang RSSI. Drone kag manual spraying gingamit para mapamatukan ang amo nga peste.
Sa datus sang Sugar Regulatory Administration as of June 5, may 1,108 ka mga sugarcane farmers ang apektado sang red striped soft scale insect sa 195 tanan ka mga barangay sa Visayas.
Ang Negros Occidental ang naga pabilin nga labing apektado kun sa diin masobra sa 2,000 ka ektariya sang katubuhan ang gina atake sang RSSI.
Suno sa SRA ang Bago City, La Castellana, kag Murcia ang gina kabig nga mga major hotspots sang infestation.
Ang Bago City ang may pinakamalapad nga area nga apektado sang RSSI – 406.02 ka ektariya, ang La Castellana may yara sang 226.36 hectares kag ang Cadiz City may 216.7 ka apektado nga ektariya sang katubuhan.
Magamay ang apektado nga katubuhan sa Negros Oriental, Iloilo kag Capiz, pero, naga lapad man ang infestation.
Kun ipaanggid sa nagligad nga report sadtong May 29, nadugangan sang 460.55 hectares pa gid ang nahalitan sang RSSI pag lab-ot sang June 5 ukon sa sulod lamang sang isa ka semana.
Ginpabaskog sang SRA ang bulig sa mga mangunguma nga apektado sang RSSI paagi sa drone application operation.
Sadtong June 11 ginpatuman ini sa sa Hda Agho, Brgy Camandag, La Castellana.
Ang pag gamit sang drone technology isa ka component sang mas ginpabaskog nga tikang sang SRA para matapna ang pag lapta pa gid sang RSSI.
Paagi sa aerial spraying tools kag serbisyo sang skilled personnel mapa baskog ang away kontra sa RSSI.*
[sibwp_form id=1]