Digicast Negros

Provincial consultant Marton Cui ginlubong na pero PNP wala sa gihapon sang suspek sa iya kamatayon

Screen grab from the funeral’s live footage

Ginlubong na kahapon sa siudad sang San Carlos si Provincial Consultant on Hospital Operations Marton Cui masobra isa ka semana matapos siya gin luthang nga nagresulta sa iya kamatayon.

Si Cui ang gin luthang sang wala pa sa gihapon makilal-an nga persona sang Abril 12 sang gab-i samtang hana nga masakay sa iya salakyan sa gwa sang iya opisina sa San Carlos.

Nalubong na ang biktima pero tubtob karon blanko pa ang PNP kag ang gin tukod nga Special Investigation Task Group sa kun ano ang motibo sa pag patay kay Cui.

Suno kay Police Lieutenant Abegael Donasco, wala pa man sila sang may ginatan-aw nga persons of interest.

Ila lang karon gina tutukan amo ang isa pa ka black nga innova nga nakit-an nag convoy sa puti nga van kag gray nga starex nga gina imbestigaran sang kapulisan matapos makita ini sa lugar samtang natabo ang pag tiro kay Cui.

Suno kay Donasco, wala nakit-an sa San Carlos ang ini nga itom nga innova kundi ini ang nakita nalang nga naga convoy sa duha ka gina imbestigaran nga salakyan sa bahin na sang Negros Oriental kun diin posible nag agi ang salakyan nga gina patihan ginasakyan sang mga suspetsado.

Hibaluon sang PNP suno ay Donasco kun sa diin gin tago ukon nag pondo ang ini nga salakyan. Padayon sa karon ang ila imbestigasyon sa kaso.

Exit mobile version
Skip to toolbar