Ginpahayag ni Mayor Greg Gasataya nga ang ginaduso nga budget sang siudad sang Bacolod para sa 2026 nagalab-ot sa P4.75 billion.
Ini mas mataas sang P350 millionkun ipaanggid sa nagligad nga tuig nga yara sa P4.4 billion. Suno kay Gasataya, ang pagtaas sang budget ginbase sa ginapaabot nga pagtaas man sang mabaton sang syudad nga National Tax Allotment halin sa national government.
Subong nga tuig, ang NTA share sang Bacolod naglab-ot sa P2,244,573,982.
Ginpahayag ni Gasataya nga ang dugang nga P350 million nga pondo ang para sa mga iskolar sang siudad, padayon nga implementasyon sang Bacolod City Comprehensive Health Program (BacCHP), bulig sa mga vulnerable sector, kag para man sa mga mandatory expenses sang lokal nga panguluhan.
Suno pa sa alkalde, ang pagtaas gamay lang gid, base lang ini sa NTA share nga kada tuig nagasaka man.
Dugang pa ni Gasataya, gina finalize pa sang executive branch ang Local Expenditure Program (LEP) para sa 2026, kag ginapaabot nga ipasa ini sa Sangguniang Panlungsod subong nga Biyernes ukon sa masunod nga semana.
Ini ang ikaduha nga tuig nga ang LEP sang Bacolod nagalab-ot sa billion-peso mark.