Wala ginbaton sang Sanguniang Panlungsod sang Bacolod City ang proposal sang Bacolod Transport and Traffic Management Department ukon BTTMD bangud wala masunod ang eksakto nga proseso.
Ginsiling ni Councilor Al Espino, pamuno sang Committee on Laws, Ordinances, and Good Government, nga wala sang resolusyon nga ginpagwa ang Bacolod Traffic Authority Council ukon BTAC may angut sa proposal nga pasakaan ang permit fee sa mga running events sa siudad.
Pagklaro niya, wala sang otoridad ang BTTMD nga maghatag sang proposal direkta sa SP. Kinahanglan nga mag-convene anay BTAC agud makabalay sang resolusyon sa pag duso sang amo nga proposal.
Nagpangabay man ang konsehal sa pamunuan sang BTTMD nga mangin responsable sa pagsunod sa mga proseso sang siudad kag sang SP.
Suno kay Espino, ang obra sang BTTMD ang pagpatuman lamang sang mga traffic kag transport protocols.
Nangin kontrobersyal ang pagduso sang BTTMD sang saka sa sukot sang pagkuha permit sa mga running events sa siudad.
Una na nga ginsiling ni Bacolod City Mayor Greg Gasataya, nga isa ka gatos lamang ang permit fee nga ginabayaran sang mga organizer sa siudad nga tuman ka barato.
Pabor ang alkalde sang pagpasaka sang permit fee apang nagapamatuk ini sa proposal sang BTTMD nga 100,000 pesos para sa masobra 42 kilometer nga event.
Si Gasataya man ang nagaserbe nga chairperson sang BTAC.
“The BTTMD cannot come up with the policy on its own. Dapat maagi na sa sa BTAC (Bacolod Traffic Authority Council) I-discuss na anay nila if the proposal is valid. Dapat may proseso na sa. I think confuse guro si BTTMD sang iya role”, suno kay Espino.
[sibwp_form id=1]