Ginsiling ni Police Lt. Peter Genovia, deputy chief sang Himamaylan PNP nga may yara na sila sang “person of interest” sa nagpatay sa isa ka chainsaw operator sa Barangay Aguisan, Himamaylan City sang Domingo, Agosto 9.
Nasapwan ang 32-anyos nga biktima sa higad sang highway sakop sang Purok 11, Sitio Tanate sa Brgy. Aguisan.
Positibo nga ginkilala sang live-in partner ang biktima, nga taga Kabankalan City.
May mga igo sang bala ang biktima sa iya li-og kag dughan.
Suno sa saksi, papauli na sila sang iya asawa halin sa Brgy. Nabali-an sang ila makit-an ang biktima nga nagahigda sa duta.
Indi pa mapat-od sang PNP kung didto sa lugar ginpatay ang biktima ukon siya ang ginbilin lang.
Sa follow-up investigation nagwa nga illegal nga droga ang isa sa mga anggulo sa krimen, suno kay Genovia, apang indi pa nila mabulgar ang iban nga detalye tungod at large pa ang suspek.
“Nausoy to sang aton imbestigador sa bulig sang pumuluyo sang Himamaylan amo to nakakwa kami info kag ginlakat to sang amon imbestigador kag positively identified sang iya live-in partner. May ara na kami persons of interest. Bale iligal nga droga ang amon ginalantaw nga motibo. Indi lang ko anay maghambal kay ongoing ang amon investigation kay basi mabatian sang suspek kag manago or ano,” suno kay Lt. Genovia.*
[sibwp_form id=1]