Makita ang pila ka mga pulis nga naga libot malapit sa mga eskwelahan sa siudad sang Bacolod kag pila ka mga lugar sa Negros Occidental.
Ini matapos nagmando ang Police Regional Office-Negros Island Region sang hugot nga seguridad sa tanan nga mga eskwelahan matapos ang nagluntad nga pagpaniro sa San Jose National High School sa Tacloban City, kung diin tatlo ka mga estudyante ang napatay kag 20 ang pilason.
Ang duha ka mga gunman, pareho man nga mga estudyante, enrolled sa Grades 9 kag 10 kag pareho nga menor de edad.
Nagpagwa man sang direktiba ang PRO-NIR sa tanan nga provincial kag intelligence units kag intelligence personnel nga pabaskugon ang monitoring online kag offline, pati na ang coordination sa Department of Education, school administrators, barangay officials, Parent-Teacher Associations kag local government units agud malikawan ang mga kalakasan sa mga eskwelahan.
Ginahingyo sang kapulisan ang mga eskwelahan nga i-review kag pabakuron ang ila security protocols, emergency response procedures kag threat assessment mechanisms agud mangin handa sa tion sang mga insidente.
Ginpahanumdoman man ni police regional director Brigadier General Romano Cardiño ang mga kapulisan nga mangin responsable sa pagtago sang ila mga government-issued firearms matapos nga ang pusil nga gingamit sa pagpangluthang sa Tacloban, iya sang pulis.
Nagapati naman si Bacolod Councilor Al Espino, chairman sang Committee on Education nga magluwas sa police visibility kag security, mas kinahanglan tutokan sang local government unit ang mental health aspect sang mga kabataan.
[sibwp_form id=1]